Shawerma all the time from darshawerma عارفين طبعا ان الاكل أذواق

Shawerma all the time from darshawerma عارفين طبعا ان الاكل أذواق

 

Shawerma all the time from darshawerma
عارفين طبعا ان الاكل أذواق واكيد مفيش اكله واحده كل الناس اتفقت عليها الا الشاورما اظن صعب اوي تلاقي ناس كتير مبتحبهاش بس هتلاقي حد بيحب الشاورما المصري واللي بيحب الشاورما السوري واللي بيحبها ساندوتشات او بيحب الفته بس في الاخر كلنا بنحب الشاورما باي شكل وبأي طريقة و دايما هتلاقي منافسه جامدة جدا بين مطاعم شاورما كتير قديمه وجديدة وكلهم بيتنافسوا انهم يرضوا اذواقنا في اكل الشاورما وتجربتنا النهارده مع مكان جديد فتح في الشيخ زايد اسمه دار شاورما وهو حقيقي اسم علي مسمي لانه بيقدم الشاورما بكل الأشكال والاذواق اللي ممكن تتخيلها يعني لو بتحب الساندوتشات هتلاقيهم بيقدموا اكتر من نوع زي عيش البطاطس وهو نفس شكل الكايزر العادي بالظبط بس معمول بالبطاطس وطعمه تحفه وخفيف جدا وهتلاقي العيش الصاج وكمان العيش البيتا اللي بيعملوه بحجم صغير بس زي القنابل اللي هتنفجر من كميه الشاورما اللي جواها
طبعا هم بيقدموا شاورما اللحمه والفراخ بس كل نوع منهم عاملين فيه تويست مختلف يعني شاورما اللحمه فيها بطاطس هوم ميد صغيرة وكريسبي ودبس رمان وبصل بالسماق عليهم نقطة خل ده غير صوص الطحينه والمكس ده مع الشاورما عامل طعم خطير اما شاورما الفراخ بيبقي عليها توميه وبطاطس ومخلل لاحظوا ان كل الصوصات اللي بيستخدموها بيعملوها بنفسهم ومش بيستخدموا صوصات جاهزة
اما لو ليك في الوجبات هتلاقي عندهم وجبة شاورما عربي معموله من العيش الصاج الخفيف اللذيذ بتاعهم او العيش البيتا المميز ولو ليك في فتة الشاورما برضه هتلاقيها عندهم بكمية محترمه وطعم مظبوط جدا
بيلعبوا بقي بالشاورما في أشكال تانيه مختلفه زي بطاطس دار شاورما ودي بتبقي فرايز عليها صوص جبنه وهالبينو وكمية محترمه جدا من الشاورما اللحمه او الفراخ حسب اختياركم وكمان عندهم حمص بالشاورما وده احلي حمص اكلناه في حياتنا بدون مبالغه ناعم جدا وقوامه مظبوط وطعمه خطييير وبرضه عليه كمية شاورما كتير اوي والطبق ده ميزته انه خفيف ولذيذ ومشبع جدا ومميز اوي
عندهم بقي أصناف تانيه خطيرة زي المسخن رول الرهيب بتاعهم وده لازم تطلبوه لما تروحولهم وكمان أجنحة الدجاج بصوص البافلو او الباربكيو والاتنين كانوا احلي من بعض وكمان التشيكن تندرز كانت حلوة اوي ومناسبه جدا للأطفال
لو ليكم في السبايسي اللي بجد يبقي لازم تجربوا سلطه دار شاورما دي اختراع عندهم بس حراقه اوي مش بتهزر
وعلشان هم مميزين ومختلفين في كل حاجه بيقدموها كان لازم الحلو عندهم يبقي برضه مختلف وهم بيعملوا اختراع اسمه بسبوسه تشيز كيك ودي هنسيبها لكم مفاجأة

 

الموضوع منقول



انتقل إلى أعلى