lo2mabaladi المكان ده قدر يغير فكرتنا عن نوعية الأماكن اللي نقدر

lo2mabaladi المكان ده قدر يغير فكرتنا عن نوعية الأماكن اللي نقدر

 

lo2mabaladi
المكان ده قدر يغير فكرتنا عن نوعية الأماكن اللي نقدر ناكل منها اكل مصري حرش محترم يعني كانت فكرتنا دايما عن الأماكن الصغيرة اللي بتبقي موجوده في اي مول او food hub انها تليق اكتر علي الفاست فود والساندوتشات والاكل الخفيف لكن لقمة بلدي اثبتلنا ان اي مكان يقدر يعمل احلي واعظم اكله طول ما عنده الجريل اللي بيتعمل عليه احلي شغل وبيصنع المعجزات والأهم طبعا من الجريل هو الشيف الشاطر اللي نفسه الحلو بيبان في طعم وريحة الاكل ويقدر يظبط الاكله الحرشه اللي بتعدل مزاجنا
المكان بيعمل شوية اكلات مصري تقيله زي الفته والرز المعمر باللحمه و بالفراخ وطاسات الكبده والسجق والمكرونات والحواوشي والرقاق الرول وورقة اللحمه والسجق والكبده يعني اكل معلمين من اللي يعدل المزاج وطبعا كالعادة كنا قلقانين وكان باين علينا واحنا بنعمل الاوردر وكل ما نطلب حاجه نسألهم الأول بتعملوها حلو فعلا بس بصراحه كانوا بيردوا علينا بثقه خلتنا مطمنين شويه وحسينا انهم عارفين بيعملوا ايه واللي طمنا اكتر الريحه الخطيرة اللي هلت علينا اول ما ابتدوا يجهزوا الاكل وحسبنا ان فيه عظمه بتحصل علي الجريل
اول حاجه لازم اتكلم عنها واديها حقها كويس هي الرز المعمر باللحمه لان ده اكتر حاجه كنت قلقان منها وحاسس انهم مش هيظبطوها بس الطاجن طلع رهيب الرز المعمر كان كريمي اوي وغرقان في القشطه وطعمه روعه واللحمه اللي فيه نضيفه ومستويه كويس جدا وطعمها مفصلنيش خالص بالعكس حبيتها جدا رغم اني بحب الرز المعمر الساده اكتر
طاسه الكبده بدبس الرمان كانت فوق العظمه والكبده كانت متقطعه شرايح رفيعه زي الاسكندراني وطعمها مع دبس الرمان والفلفل كان عالمي طاسه السجق بدبس الرمان كانت برضه حلوة بس حبينا الكبده اكتر يمكن علشان السجق كان ابن ناس ودهونه قليله وده خلاه ناشف شوية
الحواوشي اللحمه او بالجبنه الاتنين كانوا حلوين اوي وخلطة الحواشي نفسها كانت عظيمه وعجبتنا جدا
رول الرقاق بالسجق اللي معاه موتزاريلا وبطاطس كان خطير وهنا حبيت السجق ومحستش أنه ناشف خالص وكمان رول الكبده عجب ريهام جدا هما بصراحه الكبده اللي بيستخدموها نضيفه اوي وبيقطعوها صح وده بيفرق جدا في طعمها
المكرونه بالجبنه مع السجق والهوت دوج كانت عالميه واظن صورتها بتتكلم لوحدها بس فعلا طعمها كان روعه
وطبعا الحلو كان كنافه بالنوتيلا وطاجن ام علي وطاجن رز باللبن وكانوا في منتهي الحلاوة بالذات ام علي
بصراحه المكان ابهرنا ومكناش متخيلين اننا هناكل عندهم اكل بالعظمه والحلاوة دي واكيد هنرجعلهم تاني في أقرب وقت علشان نتأكد انه هيفضل علي المستوي العالي ده

 

الموضوع منقول





انتقل إلى أعلى