dojosburger تجربة جديدة في مطعم برجر جديد المفروض انه موجود في

dojosburger تجربة جديدة في مطعم برجر جديد المفروض انه موجود في

 

dojosburger
تجربة جديدة في مطعم برجر جديد المفروض انه موجود في أكتوبر بس اول ما دخلناه حسينا انه موجود في طوكيو
ستايل المكان نفسه هو اللي خلي تجربتنا المرة دي مختلفه شوية يعني بما اننا رايحين ناكل برجر ف كنا مجهزين نفسنا للامريكان ستايل المعروف في كل مطاعم البرجر بس اول ما دخلنا المكان ده لقينا ديكورات مختلفه تماما والمكان كله واخد ستايل ياباني في الديكورات وعندهم دور كامل كل القعدات اللي فيه كانك قاعد في مطعم ياباني والكراسي اللي هتحسسك انك قاعد علي الارض ويمكن هتستغربوا في الأول شكل المكان وانه ملوش علاقة بالأكل اللي بيقدمه بس مع الوقت هتحبوا الفكرة جدا خصوصا انه بيدمج بين ثقافتين مختلفين وبيقدم شكل مختلف عن أي مطعم برجر تاني وكأنه مطعم برجر فاتح في اليابان مش في مصر!
نيجي بقي للاهم وهو الاكل طبعا بيقدموا البرجر الجورميه اللي بيعملوه بنفسهم بجودة عاليه كانت باينه جدا في الطعم والبرجر كان جوسي ولحمته ناعمه وتتبيلته مظبوطه اللي فارق كمان في طعم الساندوتشات هي جودة الإضافات اللي بيحطوها مع البرجر زي نوع الجبن اللي بيستخدموها وكل الإضافات والصوصات اللي بيستخدموها واللي كان واضح جدا انها انواع ممتازة ومش رخيصه وفارقه اوي في كواليتي الاكل
جربنا اكتر من ساندوتش وعجبونا كلهم بس اكتر واحد علم معانا جامد كان اسمه Reiner وده فيه بصل مكرمل وبيف بيكون وصوص باربكيو والتلاته دول مع البرجر عاملين ميكس طعمه خطييييير وطبعا علشان احنا بنحب اللغوصه فجربنا ال Jushi lushi اللي مليان جبنه والبرجر نفسه محشي جبنه علشان نلغوص بالياباني
لازم تطلبوا الفرايز اللي عليها جبنه وصوص لحمه مفرومة لأنهم بيعملوها حلو اوي وكميتها كبيرة جدا أما الحلو فعندهم Apple pie ملهاش حل لذيذة وخفيفه بيقدموا منها سلايز واحده بس طعمها في منتهي الاجرام وممكن تضيفوا معاها ايس كريم في الحر ده علشان تبقي الجريمة الكامله
المكان في أكتوبر في لاسيتيه مول في المحور المركزي
burger cairoeats mr and mrs foodie

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *