مشويات الحمراء جدة شارع فلسطين

مشويات الحمراء جدة شارع فلسطين 1

المرة دي طلبنا صحن مشاوي مو ساندوتشات
محل قديم وله عدة فروع، طلبنا من فرع فلسطين

اللي يميزهم صحون الوجبات عندهم، كبيرة وتجمّل لو عندكم مناسبة او متجمعين

الطلب كان عبارة عن صحن وجبة اقتصادية، كيلو مشاوي مشكلة مع الرز ومقبلات وبطاطس ومكرونة بشاميل بالاضافة لعيش وثوم

اكثر شي عجبني كفتة اللحم والدجاج، طرية، النكهة جدا واضحة وطعمها لذيذ، ودا شي موجود في الاكل كله بشكل عام
مبشور اللحم والدجاج كمان كويس
الاوصال والشيش طاووق جات مرة ناشفة المرة هذي، مستوية زيادة، واطراف الشيش طاووق باين فيها طعم محروق
الرز لذيذ وكميته مرة كبيرة ما شاء الله
البشاميل باللحم المفروم، تعتبر عادية
طبق المقبلات جيد بشكل عام، وافضل شي الحمص

الاكل يكفي ٣-٤ اشخاص

سعر الوجبة الاقتصادية ١٤٠ شامل كل اللي معاها، اذا اخذتو بس مشاوي الكيلو ١٠٠-١١٠ ريال

المشاوي مع الرز في صحن حديد مغلف ب خبز وعليه قصدير، والمقبلات في علبة بلاستيك ب غطا، اما البشاميل والبطاطس في علب قصدير

الطلب كان عن طريق الاتصال بالمطعم، والتوصيل عن طريقهم على حسب الحي انا كلفني ١٥ ريال وتوصيلهم جدا سريع، وصل في خلال ٣٠ دقيقة، ودفعت بالبطاقة عند الاستلام

** يعتبر محل جيد في المشاوي خصوصا الكفتة، مناسب للجمعات، جربنا عندهم الشاورما والملوخية قبل كده وكانت طيبة كمان، السعر متوسط اذا اخذتو صحون، والطلب من المطعم ممتاز 👍🏻