للناس في طريقة الاكل مذاهب و انواع نتعرف على انماط الناس

للناس في طريقة الاكل مذاهب و انواع نتعرف على انماط الناس

 

للناس في طريقة الاكل مذاهب و انواع
نتعرف على انماط الناس في الاكل:
1- الفودي: هو انسان يعشق الاكل, عنده الاكل هواية (ممكن تلاقي في السيرة الذاتية مكتوب من هوايته الاكل) يحب يجرب مطاعم جديدة ياكل الاكلات الجديده و الغريبه, ياكل بسرعه و بنهم ؛لمن يجتمع مع اصدقائه و يرفه عن نفسه يروح للمطاعم, الخرجه معاه فله
نصيحة لو تبغى تقابله و تخرج معاه اخرج معاه الى مطعم
2- المتذوق: شخص في الغالب فاهم في الاكل, في الغالب ياكل ببطء, بعض الاحيان يفقع مرارتك و هو يتكلم عن الاكل و يحلل مكونات الاكل , يحب ينتقد اي شي و كل شي , ممكن تلاقي المتذوق يجلس ساعتين ياكل وجبه وحده
3- اللكيع: انسان ما يحب الاكل و يقرف حياتك لو رحت معاه لمطعم, ياكل اشياء محدده فقط, ما يحب الصوصات او الاكلات الجديده، ياكل في مطاعم محدوده (مثلا البيتزا ما ياكلها غير مارجريتا لانه يقرف من الببروني) بعض الاحيان يكون انسان نباتي (ما ياكل اللحوم) لانه مؤيد لحقوق الحيوانات او ما ياكل اكل بحري لانه شكلها مقرف
نصيحه لو تبغ تخرج مع واحد لكيع اتقابلو في قهوه بس لا تقابله في مطعم
4- الصحي: شخص يجلس يحسب كم سعرات الحرارية ياكل بطريقة تخليك تكره الاكل , صحي بزياده, لو خرجت معاه مطعم راح يقرفك حياتك و يعطيك محاضرات و عظات عن مخاطر الدهون المتحولة و مخاطر الخبز الابيض الشرير و اذا اتكلم في الرياضه راح يتكلم نص ساعه عن الجيم (اليوم لعب باي و بكره تراي, طيب ايش اسويلك ؟!) ,دايما يسأل عن المنيو حق الدايت في المطاعم
 شخص زي كده لا تخرج معاه الى مطعم و حاول تتكلم معاه في اي موضوع تاني غير  الاكل, و النادي؛ اتكلم معاه مثلا في الثقافه او في الاقتصاد او الكوره
5- الكول: ما ياكل الا في مطاعم خمسة نجوم او ياكل في بيته ,صعب تقنعه انه يأكل شاورما او فول من مطعم شعبي , لمن ياكل يستخدم الشوكه و السكينه (حتى مع البيتزا؟!) و اذ شفته في ستاربكس تلاقيه شغال على اللابتوب و يشرب قهوه يحسسك انه رجل بزنس مان مهم، بس لمن تدقق تلاقيه يلعب سوليدير
السؤال المهم :انت من اي نوع ؟ ممكن تكون مابين نوعيين
لا تنسى تسوي منشن لاصحابك و تذكر هو من اي نوع

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *