كافيه جبنا جدة

 

كافيه جبنا جدة

الكافيه دورين ، يتميز في تقديم قهوة جِبِنا الاثيوبيه
بس تاخذ وقت عشان تتحضر ، اذا ودكم تجربونها لا تروحون بدري زيّي الساعه ٤ العصر
 
كافيه جِبِنا الجديد [ الروضه [ شارع سعود الفيصل
 
‎⏰ اوقات العمل
من ٤ م الى ١٢ ص
 
 
– كورتادو [ ١٧ ريال
– فلات وايت [ ١٧ ريال
 
ممتازه قهوتهم و مكانهم جميل تجربه لطيفه
ونشوفكم على خير
 
 
قهوتنا اليوم بكافيه جديد جِبِنه يتميز بالقهوة الاثيوبية♥️☕️ .
 
موقعه شارع الامير سعود الفيصل📍
 
طلباتنا /
 
كورتادو  ١٧ ريال .
 
 V60 ٢١ ريال
براوني  ١٢ ريال .
 
عجبتنا القهوة 😋♥️ ديكور المكان جميل وانيق ودورين👌🏼 الله يوفقهم .. لما رجعت بحثت عن الجِبنة وقلت احط لكم المعلومة 😄✌🏻
 
(الجَبَنَة  عبارة عن حاوية تستخدم لصنع القهوة في حفل القهوة التقليدي الإريتري والإثيوبي. كما أنها تستخدم في السودان، والقهوة نفسها تسمى بونة أو (جبنة باللغة العربية). المصدر ويكيبيديا
 
 
 

كافيه جديد في مدينتي الغالية على قلبي جدة ، بالرغم من صغر المكان الا انه مريح جدا والعاملين فيه الله يسعدهم مرحبين جدا و محترفين ومضيافين بصورة جميلة جدا ، فكرة المكان و ديكوره كلها من افريقيا
وجود منطقة خاصة بالمدخنين مميزة جدا .
جربت عندهم قهوة جبنا رهيبة مرة وجربت كمان الفلات وايت والايس لاتيه بالكراميل ( ولا غلطة ، طعم مميز ، قوام كريمي وغني بالنكهة ) .
المكان كله يخليك مرتاح وانت جالس فيه وحيكون من اماكني المفضلة خصوصا انه قريب جدا من مكان عملي .

تجربة مميزة في مكان رايق ومختلف، القهوة ممتازة واصناف الحلا والكرواسون ممتازين، الخدمة جيدة جدا، اكررها اكيد باذن الله.

في موسيقى
ما في بارتشن
مسموح دخول الاطفال
مسموح التدخين في الغرفة المخصصة
جلسات داخلية فقط
دورين افراد وعائلات
الخدمة ٩.٥/١٠ بشوشين ومهتمين.
النظافة ٩/١٠
الاسعار متوسطة.

الطلبات:
قهوة جبنا ١٠/١٠ ما قد جربتها قبل كذا لكن عجبتني جدا، حموضتها ومرارتها قوية وثقلها بين الاسبريسو والامريكانو.
كيكة كرانشي ٩/١٠ لذيذة مرة التغطية ممتازة والكيكة هشة.
كرواسون جبنة ٩/١٠ ممتاز والحشوة مليانة جبن.
كابتشينو ١٠/١٠ ممتاز جدا الحموضة مرتفعة ولذيذة.

ملاحظة✨: هذا الرأي هو رأي شخصي فقط و”لولا اختلاف الاذواق لبارت السلع”.

حبيت جداً فكرة المكان، وكيف انهم جايبين الاشياء التراثية اللي ادتني احساس كاني باثيوبيا. الجبنة كانت ممتازة والجو العام كان مرة لطيف رجعني لايام زيارتي لاثيوبيا. جربت كمان الفلات وايت وكانت ممتازة. مكان جداً مناسب ورايق للجسلة والشغل والاجتماعات المهمة. هل حكرر الزيارة؟ أكيد حكررها ان شاء الله خصوصاً بالايام المميزة زي يوم الجاز.

التقييم الكامل 👇🏼👇🏼 Full review
بالصور 🍱 🥗🥘 With pictures

اوصي به بشدة 🤩
المكان جميل والديكور اكثر من رائع
من الكوفيهات المختصه الجيدهـ في جده👍🏼😍
لا تنس أبدًا بتجربة (فلات وايت & القهوه المقطره)🤤
شكرا لكم 🙏🏼☺️

زرت المكان بتوصية من صديق، من زمان وأنا نفسي أجرب قهوة الجَبَنَا بالطريقة الأصلية، بس للأسف مافي مقهى حديث يوفرها ويوفر جلسات مناسبة؛ فمرة انبسطت بالمكان دا وعلطول زرته 😍
القهوة غريبة ولاذعة وطعمها مركز وحمضيتها عالية مقارنة بالقهوة اللي متعودين عليها ، بس حلوة التجربة 👍🏼

حبيت المكان الديكور يعكس الهوية ومتناسق مع الاسم والمنتج، الموظفين بشوشين وحكوني قصة أقدم جبنا ( إناء شهير للقهوة في اثيبوبيا ) موجودة في المحل ترجع لجدة أحد أصحاب البزنس ☕️🇪🇹

عندهم تنوع في المشروبات لو ماكنت من هواة القهوة كركديه وايس تي وغيرو .

لو حتطلب قهوة من عائلة الاسبريسو ممكن تتوجه لمكان تاني ماعجبني لا الفلات وايت ولا الكورتادو وطلبت من الباريستا يعيد لي إعداد الكوب وبرضو ماقدرت اكمله يحتاجوا يطوروا دي النقطة .

*في منطقة تدخين، ودورات مياه، وألعاب طاولة مناسبة .

ماشاء الله اول شي ريحة المكان رايقة
ثانياً اخلاق الموظفين ممتازة وبشوشين
ثالثاً طعم القهوة لذيذ ورايق
المكان طبعاً دورين تحت وفوق
ويقدمون القهوة الاثيوبيةمرة طعمة
طلبت كابتشينوا
ولاتية ايس وايت موكا
الموظفين جابوا لنا تست نذوق 🙏
الحساب 38

كوفي بطراز افريقي
يتميز بالقهوه الاثيوبيه
كوفي جميل جداً بطريقة تقديم القهوه
بالشباب الموظفين وتعاونهم
كوفي مازال جديد اتوقع نجاحه في قادم الايام
الاكواب مصممه لتكون بالشكل الافريقي
الديكور مصمم على الطريقة الافريقيه
يتم تقديم حالياً قهوة الجبنا ( نوع من انواع القهوه الافريقيه المشهوره ) مجاناً كنوع من الدعايه وهذا شئ جداً جميل للتعرف على الاصناف الجديده
تم طلب فلات وايت وكانت القهوه جداً رائعه تتميز بالامانه عن باقي الكوفيهات وعند السؤال عن نوع البن المستخدم كان بن اثيوبي
انصح بزيارة الكوفي التمتع بالقهوه الاثيوبيه
والجلسات جداً مريحه ويوجد في الكوفي طابق ثاني
كل الشكر والتقدير لادارة الكوفي والشباب المتواجدين
لابد من اعادة الزياره عدة مرات

المكان مره جميل ومليان تفاصيل حلوه ، سعر القهوه كتيرر مقارنة بالكميه الكوب صغير طلبت امريكانو ، ماعجبتتي للاسف البُن بلند ماعندهم انواع بن نوع واحد بس ، الاكواب مررره جميله وهولدر الاكواب شكلوو مره حلووو ، الشي المهم المكان غير مطبق للاحترازات ماطلبوني توكلنا ووفي كم شخص جوا مو لابسين كمام ولا قياس حراره ودي الأشياء جدا مهمه خاصة دي الفتره ، اتمنى لهم التوفيق

مكان صغير و هادئ ، كابتشينو ممتاز ب ١٧ ريال ، سبانيش لاتيه بارد ب ٢١ عادي زي اغلب الكافيهات ، كرنشي شوكليت كيك لذيذة اعتقد ب ٢٩ ريال .
اتوقع اني ماحرجعلو مو عشان شيء بس درجهم اللولبي يجيبلي دوخة🌚😂💔

صراحة ما كان زي ما اتوقعت ، خذلني ، اسمو (جَبَنة) فاتوقعت جبَنَة ع الطريقة الافريقية فعلاً ولا ليش اسمو جَبَنَةً كان تسموه قهوة او اي شي تاني كان اخدنا قهوة تركي في اي كفي عادي او شربنا سبريسو من ستاربكس مثلا وخلاص ! ليش نجي ل جَبَنة بالذات من اخر الدنيا وبالاخير مجرد بلاك كوفي عادية! اذا اسمو جَبَنة مفروض تتقدم كـ جَبَنة فعلاً ، ع الأقل تنحط في الدلة حقة الجبنة او ع الأقل فناجين مو اكواب ورق وقزاز عادية زي حقة الكافيهات العادية! و نحي للطعم الطعم فعلياً خذلني مجرد بلاك كفي عادية !استغربت وقالولي طيب نجيبلك (الدوا) (الزنجبيل) بس مفروض ينغلي مع القهوة ويدوب جوتها مو اصبو أنا كإضافة كنو سكر ويقعد مطفح ع سطح القهوة ! صراحة ما حبيت أبداً كون هو اسمو جَبَنة وعزيزة علينا الجَبَنة وبالاخير طلع كفي عادي!! ، غيرو الاسم وحينزل سقف توقعاتنا لكفي عادي !! وحيكون كويس ، او اذا حيحمل اسم جَبَنَة خلوها جَبَنَة فعلية وكتير ناس تحب الجَبَنَة عشان كدا نبغاها جَبَنَة فعلاً ، الديكور حلو وكلشي بس هوا اللي ذكرتو من ناحية الطعم وطريقة التقديم اللي مفروض تكون تراديشنال وجميلة ليس كما حدث ! وشكراً .

جميل جدا وهادي ورايق…يوجد جلسات بالطابق العلوي ويوجد غرفة للمدخنين. الاثاث و التحف جميلة ومناسبة لجو وثقافة الكافيه الإفريقية.

متوفر العاب طاولة مختلفة مثل الشطرنج.

جربت الكابتشينو و الكرنشي شوكليت كيك…الكابتشينو لذيذ جدا جدا و الكيك لذيذ جدا وكرنشي.

عيبه الوحيد السعر لانه يعتبر اغلى من الستاندر المعروف.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *