فيه مصطلح دائماً أسمع به بالطيران أو الفنادق،، اسمه (أب قريد)،،

فيه مصطلح دائماً أسمع به بالطيران أو الفنادق،، اسمه (أب قريد)،،

 

فيه مصطلح دائماً أسمع به بالطيران أو الفنادق،،
اسمه (أب قريد)،،
ومعناه الترقية أو تحسين الدرجة،،
يعني بالطيران حاجز ضيافة يخلونك درجة رجال الأعمال،،أو الأولى
أو تكون حاجز غرفة بفندق فيعطونك جناح
وهكذا،،
موضوعنا اليوم
كيف تقومين بترقية أو تحسين درجة أو أب قريدنق لطبق الحلو اللي سويتيه؟؟
لنفرض إنه كيك أو بسبوسة أو أي صينية حلو أنت متعوده تسوينها؟؟
وهنا ما راح أتكلم عن مكوناته أو طريقته الفعلية ،،
فقط الأمور التحسينية،،
التي تخليه يرقى لذائقة أحبتك،،
١/طبق التقديم له دور كبييييييير جداً جداً في ترقية الحلو وتحويل نظرة الناس للحلو اللي سويتيه من حلو عادي إلى فخم،،
يقال على سبيل التهكم ،،
إن الناس صارت مو مثل أول ،،،
تهتم بالمواعين أكثر من الأكل،،،
ياربي لك الحمد حمداً كثيراً طيباً مباركاً فيه،،
هالحين كل أحد شبعان ورويان،،
بس المواعين الزينة لها تأثير لاينكر على منظر الحلو والأكل بصفة عامة،،
أنا هنا عندي علبة شوكولاتة لذيذة كانت جايتنا من بيت عمنا فهد الله يسعدهم ويوفقهم ويكثر خيرهم ويغنيهم ويحلي أيامهم وآخرتهم فيوم خلصت الشوكولاتة مسحتها واستعملتها ،،،
نوعية العلب هذي جميلة جداً ،،
حلو تاخذين فيها مشاركاتك ولا تضطرين بآخر المناسبة تقولين وين صينيتي،،
أتوقع موجودة بأحجام مختلفة بمحلات الكماليات،،
لكن ما أعرف سعرها،،
لكنها بالمجمل ناجحة
٢/طريقة تقطيع الحلو،،
فيه مناسبات كثيرة تشوفين الحلو وتشتهينه،،،
لكن إما إنك ما تبين تقطعين أو إن القطع الموجودة كبيرة فتترددين ولا تاخذين،،
لذا كان التقطيع ووذافته له أثر كبير في تحسين درجة الحلو اللي سويتيه ،،،
وأنا معجبة أشد الإعجاب بقطاعة إيكيا اللي في الصورة،،
ما أتذكر بكم ولا أدري هل لازالت عندهم أو لا،،
يمكن عندي من عشرين سنة،،
ماشاء الله تبارك الله،،قديمة بس أحبها،،
٣/الذر أو الرش،،
المكسرات المجروشة الموجودة عندك بالفريزر فستق،،،لوز،،،جوز هند،،،هذا له تأثير حلو على طعم الحلو وشكله ،،أنا هنا خفت إن جوز الهند المحمص ما يثبت على وجه قطعة الحلو فحطيت نقطة من الكراميل،،
٤/التغليف بسولفان وبشريطة ستان أو خيط خيش وكرت (صنع بحب) له لمسة مو بسيطة على الحلو،،،حطي لك درج أو رف لهالأشياء هالخرابيط،،،ولايخرج أي شيء من بيتك إلا بعد وضع هاللمسات،،،ترى مرررة حلو ومو مكلف أبداً بتاتاً ألبتة أنا هنا ماسويت كذا لأن ضيوفي عندي بالبيت فما يحتاج أغلف،،

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *