شاورما لنوني جدة

شاورما لنوني جدة

طلبنا من عندهم شاورما شامي، شاورما وسط، عربي، باشكا، فنتكا، واكيد ما ننسى #بيبسي

نبدأ بالاسماء الغريبة
فنتكا هيا بطاطس ودجز مع شاورما وجبنة وصوص، حلوة فكرة الودجز والطلب لذيذ، ما تحس انه دسم او لغوصة كثير، والودجز مستوية كويس


باشكا، هوا نوع عيش مختلف، فيه شاورما وجبنة مع صوص، ويجي ٤ قطع، طعمه كمان جيد وتحسه خفيف لكن في رأيي الشاورما كميتها قليلة مرة الصراحة

باقي الاكل ما يحتاج شرح، الشاورما الوسط والعربي نفس الشي، والشامي طبعا عيش شامي
الاكل كله بشكل عام حسيناه خفيف، ما تتعب لما تاكله، الثوم حقهم مو قوي

الواحد ياكل باشكا او ساندوتشين

فنتكا صغير ١٧، باشكا ٢٤، عربي ١٤، شاورما ٧

الساندوتشات ملفوفة ب ورق وباقي الاكل في علب خاصة، وكل شي في كيس بلاستيك، بس يحتاج يقفلوه من المطعم

الطلب كان عن طريق مرسول، الصراحة اتأخر علينا ووصل شوية بارد، موجودين كمان في وصّل و سويفت اوردر

** الشاورما عندهم خفيفة وطعمها كويس، وغير الشامي والعربي عندهم اختراعات جيدة زي الفنتكا، ومناسب لو حابين تنوّعو، اما اذا تحب الثوم قوي وواضح، او تبغى شاورما لحم، دوّر محل ثاني، والطلب من سويفت اوردر ارخص شي 👍🏻

هل مستعدين تطلبو شاورما من محل بعيد عنكم وممتاز، ولا تفضّلو شي جمبكم مستواه عادي بس عشان يكون حار ؟