زمان لو تفتكرو يا جيل الطيبين (الي عمرهم الان ٣٠ و

زمان لو تفتكرو يا جيل الطيبين (الي عمرهم الان ٣٠ و

 

زمان لو تفتكرو يا جيل الطيبين (الي عمرهم الان ٣٠ و ما فوق) كنا اذا نبغى نروح ناكل و محتارين كنا نروح شارع المطاعم (شارع التحليه) كان فيه الديوان و ومبي و شيخ البيتزا و بوباي و غيرو من المطاعم و بدرجه تانيه كنا نروح شارع الاندلس فيه ويندو (شعاره بنت ام ضفيرتين شعرها احمر) و تاكو بيل و ديري كوين و اكبر فرع لمطعم الديوان
مع مرور الوقت اتغير تركيز المطاعم و طلعت المطاعم الشعبيه في شارع حراء و المطاعم الراقيه في طريق الملك و حافظ شارع التحليه على اهميته في المطاعم و بدأت المولات توفر ركن للمطاعم اما الان و في اخر 5 سنوات بدأ المطاعم تتركز بصوره كبيره جدا في شارع الامير سلطان اخده الجو من التحليه و الاندلس ، كتير من المطاعم سواء الجديده او فروع جديده لمطاعم قائمه فتحت هناك
و لسه في عدد كبير جدا من المطاعم في شارع الامير سلطان راح تفتح قريبا
شارع الامير سلطان من ميدان التاريخ الى تقاطع شارع السلام قدرت احصي عشره مطاعم راح تفتح قريبا:
1 مطعم اسيوي اديمامي في ايه مول
2 ول دن في ايه مول
3 سرايا لطيف مطعم تركي
4 فرع جديد لمطعم ابل بيز
5 دونر شباب مطعم تركي للدونر
6 بودي فيول مطعم صحي
7 بيتي اند مور مطعم برجر
8 منطقة الجمبري
9 رستو شوب مني عارف حق ايش بس في الغالب انه مطعم
10 مطعم هولي هندي
طبعا غير المطاعم الي راح تفتح في تقاطع شارع الامير سلطان مع شارع صاري
و طبعا ده غير عشرات المطاعم الي فتحت السنه الماضيه في شارع الامير سلطان من بدايته الى نهايته
و غير المطاعم الي فتحت في تفرعات شارع الامير سلطان زي شارع صفيه بنت عبدالمطلب
و غير عربات الفود ترك الي موجوده في شارع احمد بن حنبل المتفرع من شارع الامير سلطان
صار الشارع فيه عجئه مطاعم خيو
لذلك استحق شارع الامير سلطان لقب شارع المطاعم حتى حسب التصويت في مجتمع جدة فودي، الناس اختارت شارع الامير سلطان كشارع المطاعم
و سلامتكم

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *