اسباب فشل مشروع المطعم

اسباب فشل مشروع المطعم.
١- عدم وجود زباين .. يعني بالعربي الصريح لما يكون مطعمك فاضي .. كثير ما يدرون ان هذا يأثر كثير كثير كثير في قرار اي زبون ممكن يمر على مطعمك .. سبحان الله الناس تتشجع عالمكان لما تشوف زحمة عليه .. طبيعة البني ادم يتطمن لما يشوف الناس تتسابق على مكان ..
.
.
٢- نظافة دورات المياه .. اخ بس وش اقول .. كثير مطاعم ندخلها تكون أوكيه يعني نظيفة بشكل معقول و من تدخل الحمام تشوف الوصاخة و القذارة بأنواعها .. و بعض اصحاب المطاعم و الموظفين ما يدرون ان اللي يشوفه الزبون في دورة المياه يتخليه في المطبخ .. اي اي اقولها و انا صادق .
.
.
٣- ريحة المطعم .. حتى لو كان نظيف ترا مو معقول ادخل مطعم و ريحة القلي و الطبخ تعجج عججج والله لو اني لابس و كاشخ و متعطر بطلع على طول و لا اقعد دقيقة .
.
.
٤- النفسية الحامضة لموظف الكاشير و الاستقبال ! تكلمنا فيها كثير و اللي بقوله الحين ان اذا انت تشوف مطعمك كويس و اسعارك كويسة و موقعك كويس و ما عليك سوق ! .. راجع و بنظرة سريعة تعامل الموظفين مع زباينك .
.
.
٥- بثارررررة و لقافة موظفين المطعم او حتى صاحب المطعم مع الزباين .. ترا حتى لو انت صاحب مطعم مو معناتها تنشب نشبة عنزروت في وجه الزباين .. خلك خفيف لطيف مريح .. خلك موجود وقت الحاجة لك و وقت طلبك و خل الزبون يحس نفسه انه في بيته و مكانه .
(( للأمانة هذي صارت تنشاف اكثر في المقاهي ))
.
.
٦- لازم تتحمل الزبون ؛ لازم تشرح للزبون ؛ لازم تراعي ظروف الزبون ؛؛ لازم ما تعامل الزبون معاملة ندية و تطول بالك عليه ..
المكان انت فاتحه للزبون ..
.
.
٧- تقبل وجهات النظر و الاراء
راي اعجبك رحب فيه و حسس الزبون انك مبسوط برايه .. راي ما عجبك تعلم فنون التسليك المريح .. ترا احيانا بعض الزباين يقول راي سلبي او انتقاد من زود محبته للمكان .. تلقاه يشوف كل شيء اوكيه بس في شيء منغص عليه عادي خله يقول رايه وش بيضرك .
.
.
٨- لا تنتقد مطعم منافس لك في وجه الزباين و علم موظفينك ما ينتقدون اي مطعم منافس في وجه الزباين ؛ هذا الشيء راح يأثر كثيرررر في مصداقيتك .
.
.
٩- المنيو الكبير مرة و اللي ابي كل شيء عندي بيضيعك .. قلناها قبل و نكررها المنيوووو هالايام لازم يكون محدود و بنفس الوقت فيه تنوع مرضي .
.
.
١٠- اكبر غلط انك تحدد المكان لفئة معينة من الزباين خصوصا هالفترة اللي كل مكان صار مفتوح للجميع عوايل ؛ عزاب ؛ اطفال ؛ اجانب ؛ عرب ..
سالفة والله اكثر زبايني بنات يعني خلاص اهمش الشباب و ما البي طلباتهم او رغباتهم و العكس ترا حتى بعض الاماكن الشبابية صار لازم توفر متطلبات العوايل من جلسات و خدمة عدلة .
.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *