مطعم كيان مصر القاهرة

مطعم كيان مصر القاهرة
 مكان لسه فاتح جديد في قلب مصر الجديدة في عمارة من العمارات الاثرية الجميلة اللي بتتميز بيها مصر الجديدة من زمان 😍😍.. المكان واسع وفيه قعدات حلوة ومراجيح وديكوراته شيك جدا وهتلاقوا نفسكم عاوزين تتصوروا هناك كتير في كل ركن في المكان ده غير إن اللون الاخضر اللي بيغلب علي الديكور مخلي المكان مريح نفسيا.. وطبعا الراحه في المكان بتكمل بالخدمة الممتازة من كل الموجودين من أول الاستقبال والناس كلهم friendly جدا وبيتعاملوا بمنتهي الذوق والاحترام 🥰🥰
نيجي بقي لأهم حاجه وهو الأكل طبعا اللي كان في نفس مستوي جمال المكان وشياكته وده طبعا واضح من طريقة تقديم الاطباق زي ما انتوا شايفين بس الاهم من الشكل هو الطعم وبصراحه كل الحاجات اللي جربناها عجبتنا جدا بس فيه حاجات لازم هنطلبها في كل مرة هنزورهم فيها وأولها شوربة السي فود اللي مكناش متوقعين واحنا بنطلبها انها هتكون بالعظمه دي ومستواها مايقلش ابدا عن الشوربه اللي بنطلبها في اي مطعم سمك مشهور.. الشوربه قوامها مظبوط  طعمها تحفه ومليانه جمبري وكاليماري وكابوريا بكميات حلوة جدا 😋😋
تاني حاجه لازم تطلبوها عندهم هي الكريسبي باستا الغرقانه حرفيا في الموتزاريلا والوايت صوص وكمان صوص الشيدر اللي ظابط الطعم مع التشيكن كريسبي.. بجد طبق خطيييير ولذيذ بشكل ما يتوصفش🤤
من المقبلات طلبنا (ميكس كيان) وده بيبقي فيه موتزاريلا ستيكس وتشيكن استربس وسبرنج رولز وفرايز.. وكمان طلبنا طاسه سجق بدبس الرمان وعجبنا طعمها جدا والسجق نفسه تتبيلته ممتازة
من اطباق التشيكن طلبنا (تشيكن هكاري) وده عبارة عن صدور فراخ مقليه عليها مشروم وزيتون وسموك بيف وموتزاريلا.. الطبق ده كان ترشيح الشيف لينا وطلع عنده حق فعلا لانه بجد من الاطباق المميزة جدا عندهم وعجبنا أوي 😋
كمان جربنا بيف فاهيتا ولاحظنا ان شرايح اللحمه اكبر شويه من اللي متعودين عليها بس كانت مستويه حلو اوي وطعمها مع الفلفل الاخضر والزيتون والبصل والفلفل الالوان عاملين مع بعض ميكس هايل وبتتقدم مع الرز المكسيكي وفيه درة وفاصوليا حمرا… الناس اللي بتحب الفاهيتا هتعجبهم جدااااا 🤩
طبعا المنيو عندهم international ومليان حاجات كتير اوي وطبعا تجربتنا دي هتخلينا نزورهم كتير علشان في كل مرة نجرب حاجه مختلفه

Image.jpegImage.jpegImage.jpegImage.jpegImage.jpegImage.jpegImage.jpegImage.jpeg

انتقل إلى أعلى