مطعم كابانا جدة برج روفان

 
مطعم كابانا جدة برج روفان

 
مطعم كابانا شرفنا من دبي الي جدة
 
تم اخيرا إفتتاح مطعم
 
كــابـانـا | KABANA
 
@kabanasaudi
 
الأكل طبعا من النوعية تبع المطبـخ الأفغـاني بالاضافة الي اكلات منوعة  انترناشـونال 
 
المكان عجبني واسع يتسم بالروعة والمساحة 👌🏼  والديكور قمة في الذوق والروعة 
 
يفتح 24 ساعة  ولكن في الوقت الحالي 
 
مواعيد العمل
 
مـن : 8:00  م  الـى : 2:00  ص
 
يوجد فرقة طربية ، الطرب عندهم يوميا مـن السـاعة 9 م لـ 12 منتصف الليل
 
 الطلبات من منيو كابانا كانت :
 
  • مكس مزة بـ 53 ريال
  • رز كابلي بـ 47 ريال👌🏼
  • بطاطس مقلية بـ 35 ريال
  • حبيتها مره مقرمشه وبهاراتها 👌🏼
  • مشاوي مشكلة بـ 110 ريال 🤤👌🏼
  • موهيتو بـ 48 ريال
  • باشن فروت موهيتو بـ 48 ريال
  • سلة خبز بـ 8 ريال
  • مكس مخبوزات مع تميس 🤩
الأكل لذذذذيذ 👌🏼
 
يوجد لديهم معسلات  بقيمة 220 ريال
 
توجد جلسات داخلية بدون تدخين
ويسمح بدخول الاطفال
 
ويوجد جلسات خارجية
 
حالياً لا يوجد حجز فقط انتظار
 

الموقع : الروضة – شارع سعود الفيصل ( برج روفان )

 
 
 
 

أجواء صباحية مميزة في هذا الجو الجميل مع فطور خارجي وخدمة ممتازة .. 👌🏼
طلبنا كان فطور لشخصين، ماشاء الله الكمية وفيرة..
كنا ٢ كبار و ٣ أطفال كفانا وزاد..كان فيه نوعين بيض، طبق أجبان ومكسرات وتين مجفف ومشمش مجفف. طبق عسل ومربيات، طبق خضار، وكايمك..
الشاهي كل ما خلص يجيبولك غيره ..
+أحب اللفتات الصغيرة أحسها تعطي انطباع بالاهتمام البالغ بالتفاصيل : حبة الكوكيز الصغيرة مع كل كوب شاهي كانت حركة لطيفة 💓
الأجبان جودتها عالية، العسل والمربيات كلهم ممتازين..
العيوش ساخنة ولذيذة ..
البيض لذيذ برضو .. 👌🏼
خدمتهم ممتازة جدًا.. سريعين وخدومين وتلاقي طلبك عندك قبل ما تفكر انه متى ح يجي !
رغم انه كان المكان مليان بالزباين ..

والڤيو مع الغيوم كان تحفة ..
عندهم جلسات داخلية وخارجية.
النظافة ممتازة ..
حتى الحمامات اكرمكم الله كانت نظيفة ورائحتها عطرة ..يستاهلوا ٥ نجوم وان شاء الله يفضلوا على هذا المستوى وافضل ✨👌🏼

طبعا مطعم غني عن التعريف مكانه حلو و الديكور روعه و اكله جدا لذيذ .. بس صح عيبه اسعاره غاليه تكتين و غير انه ماشاء الله مرره زحمه بالذات التراس .. و دي بعض الصور .. و طبعا فيه معسلات

المكان حلو والديكور جميل في معسلات دخولي الساعه 4 العصر فالمكان ما كان زحمه الموسيقى عاليه جداً الصراحه اما الاكل لذيذ لذيذ لذيذ جداً كل طبق اخترنا كان لذيذ جدا والاسعار مرتفعه مرره اكلنا كان ب 700 وشي بس يستاهل التجربه والكميه جاتنا بالعدد مثلا الريش جاتنا 4 والكباب 4 التبوله كانت صحن صغييير يعتبر كميه قليله للعائلات الكبيره

المكان كجو عام جميل انا جيته فطور فحتكلم عن الايجابيات والسلبيات:-

الايجابيات
١- عندهم في الصباح خدمة صف السياره مجاني… فمعرف ان كانت الخدمه دي متوفره ليلا خدمة مجانيه او لا لكن عموما شي جميل منهم.

٢- عرض الفطور سعره ممتاز الكميه تكفي اكثر من شخصين يعني من اربعه الى خمسه بنات ومن ثلاثه شباب والميزه الي عجبتني ان الشاهي يصبلك اكثر من مره طول وقت الفطور كل هذا بسعر ١٦٠ ريال حرفق لكم الصور

٣- الموظفين خدومين جدا ويساعدوك

٤- تقديم الفطور سريع جدا يعني ما انتظرنا ولا خمسه دقايق والاكل نزل

السلبيات

١- صحيح مدحت الفطور لكن طريقة اختيار بعض الاصناف اتمنى يغيروها زي الاجبان مثلا، حاطين اربعه انواع من الاجبان لكن اثنين منهم مررره سيئه اعتقد في وحده ماعز والثانيه طعمها زي فكره البلو تشيز، جبنة الظفاير مهي طعمه

٢- ياريت لو كان فيه اكثر من خيار واحد لعرض الفطور.

٣- الشيشه سعرها ١٥٠ لحالها فياريت يكون لها عرض مع الفطور زي باقي الاماكن المعروفه.

٤- الجلسات الخارجيه الذبان فيها مزعج جدا اتمنى ان يجدو حل للمشكله دي

٥- الحساب اتأخر الين ما جانا… لكن اعتقد ان هذا الشي عرضي لا اكثر.

زيارتي اليوم لكابانا جدا رائعة. المكان و الموظفين جداً رائعين خدمنا واحد اسمه Mohi. وكان جداً خلوق و سريع في الخدمة وبكل امانه جميع الموظفين يخدموا الطاولة الوحدة مالحقت اشوف اسمائهم بس بالمختصر طاقم جداً مبادر و متعاون و مستحيل يخلوا العميل ينتظر. الفطور مره حلو و الترتيب والمكان و التهوية مررره حلوة صراحة اجواء صباحية رائعة باذن الله راح اكرر الزيارة في اوقات مختلفة و اجرب الجلسات الداخلية .

أجواء المطعم حلوة والديكور مرة يجنن
الاكل جيد . طاقم العمل لطيف جداً
يستحق الزيارة ولكن اللي ماحبيته فالقعدات الداخليه انها فاضيه بشكل ممل بعكس القعدات الخارجية
ولكن سعرها مبالغ فيه شوي..
شفت تقيمات عالية على وجبات الافطار ف ان شاء الله لي زيارة اخرى صباحية .

الخدمة مميزة، الموظفين مرحبين وبشوشين، الاجواء العامة للمكان مبهجة، الشيشة ممتازة، كل شيء معمول بالمسطرة.
الطلبات:
١- سلطة يونانية.
٢- كباب سلطان.
٣- شيشة في اي بي تفاحتين.

ملاحظة بسيطة ياليت ايجاد حلول لكثرة الذبان.
وشكرًا.

الصراحة مطعم فخم ‏تصنيف VIP ،، ‏و ‏يخدمونك من عيونهم ‏وعندهم خدمة (valet parking ) مواقف السيارات وهذا الجميل عندهم ،،
وأجواء المطعم اشجار طبيعيه وخضار ونوافير ،، وبالليل الاناره رووعه خصوصاً عند النوافير ،، وفيه ازعاج مررره السماعات صوتها مررره عالي ،،
والميزه انه مستغل كل مساحات المطعم بجلسات داخليه وخارجيه ، حتى المساحات الصغيره مررره تلاقي فيها كرسي وطاوله اقل شئ فيعتبر ضيق نوعاً ما ،،.
والجلسات الخارجيه مخصصه للمدخنين والمسعلات والشيشه ،، ومصلى عام في الطابق اللى فوقه ،،.
الأكل بشكل عام يعتبر متوسط المذاق يعني ،، والسعر غالي جداً بصراحه تدفع الفاتوره وانت مغمض من جمال المكان والفخامه اللى تبهرك ،،.
يعني من الاخير تدخل جوعان، تخرج جوعان 😁

المطعم جدا فخم وراااقي
فيه جلسات داخليه وخارجيه للمعسل
الاكل لذيييييذ
الاسعاااار اووووفر مرتفعه للمشروباات
الخدمه سريعه

كمية الاكل ممتازه للشخصين
الاطباق لذيذه

السلبيات الاسعار جدا مرتفعه ..

اليوم كانت اول زياره لي للمطعم المطعم موقعه رائع ، وتوجد خدمة صف السياره ، المكان كبير وواسع ، ويوجد جلسات داخليه وخارجيه ، الديكور رائع ورايق ، الخدمة فوق الممتازه ، والاهم من هذا الأكل لذيذ والكمية كبيره ، الاسعار مرتفعه .

المكان رائع الديكور رايق والجلسات مميزه مع الشحر والنوافير ، المنيو منوع بس الفطور يحتاج تنوع أكثر ، الخدمة ممتازة وسريعة، يعيبها ريحة المعسلات مغطية عالمكان عالصبح لو يكون فيه تخصيص جزء من الجلسات الخارجية للمعسلات، فيه جلسات داخليه لكن ليست بروعة الديكور الخارجي.

انيق وراقي واكله لذيذ ، الاسعار مرتفعه نوعاً ما ولكن تعتبر طبيعية لمثل هذه الاماكن .. تاخروا علينا شويه في الخبز والشوكات والمناديل ممكن بسبب الضغط لاني زيارتي كانت صباح يوم العيد ، ولكن مجملا الخدمة ممتازة والمطعم يستحق الزيارة 👍🏻

المكان بطل👍
جلسات داخلية و خارجية و يوجد تكييف للجلسات الخارجية
أيام العطلات يكون مزحوم جدا يفضل الحضور بدري
الطعام تقديمه رائع
الموظفين متعاونين جدا و عند الطلب متواجدين

يعاب عليه الاسعار المرتفعة جدا مقارنة بمن في مستواه
و بفرع ( دبي ) الرئيسي

فطور في مطعم كابانا .مكان رايق وجلساته اجمل .يوجد جلسات داخليه وخارجيه كلها احلى من بعض .
طلبي كان فطور كابانا لشخصين او ثلاثه.ب149ريال فقط
منيو محدد (سيت منيو )تركي منوع وكمية كبيره
3انواع بيض (شكشوكه .وبيض عيون .وبيض تركي .)
سجق تركي لذيذ وسلة خبز سميت👌🏻😋
قشطه .عسل،مربى ،نوتيلا،زيتون،وطبق اجبان مشكله☺️😍
طبق خضار 🍅🥒
شاي غير محدد☕️
الموقع حي الروضه.برج روفان،شارع سعود الفيصل،،

جربت الفطور عندهم طلبت فطور متكامل اكنا ٣ اشخاص الكمية جيدة الشاي كل ماخلص تقدر تطلب المكان راقي وجميل التعامل جدا رائع
ان شاء الله اجربو ثاني مرا غدا او عشا كمان
يستحق التجربه..

التجربه كانت جميله و المكان اجمل
جلسات خارجيه وداخليه و اجواء خياليه
الخدمه جيده جدا
لديهم ايضا خدمة صف السيارات
الاكل يعتبر جيد جدا
طلبي كان شيش طاووق … لحم بالجبنه … سلايدر… بطاطس
اسعارهم تعتبر مرتفعه
بغض النظر ع الاسعار المكان يستحق التجربه

عندي ملاحظه ومستمره عندهم
الخدمه في الويك اند تتأخر قليلآ

خدمتهم رهيببببة، أول ماوصلنا أخذوا السيارة وعطونا جهاز، خدمتهم للباركنق حلوة، القهوة والحلويات لذيذة، (بس تعليق بسيط أم علي ماهي أم علي المعروفة، تقريباً نفس اللي يسمونها الكذابة أظن) طلبنا ٢ فلات وايت، ١ سوفليه، ١ أم علي ب(١٨٩ ريال) بس أنتبببهوا بعد الساعة ٦ المغرب يحسبون الشخص ب٢٠٠ مدري ٢٥٠

بصراحة الخدمة ممتازة و المكان حلو
اخذنا فطور لشخصين الكمية ما شاء الله تكفي اكثر من 2 .
الشاي مجاناً.
في المساء الدخول مبلغ محدود
الموظفين متعاونين و المكان نضيف

المطعم في برج ريفان الدور الاول وفي خدكة صف سيارات ب35 ريال
الجلسات خارجية ابداعيه في الاجواء الحلوة وفي مكيفات كبيره تلطف الجو 10/10
وفي جلسات داخليه
الخدمة سريعة في الصباح 10/10
الموظفبن لطيفين
الزيارة كانت للافطار من الساعة 10-12
الطلبات
جبن عكاوي ع الصاج لذيييذه وكبيرة 10/10
طبق اجبان مشكل 7/10 مو كل الانواع حبيتها
سلة مخبوزات 8/10
السميت التركي مره يابس
شاي بالنعناع مضبوط10/10
موهيتو مكس بيري لذيذ 10/10
ليمون بالنعناع 10/10
انواع البيض عندهم للافطار محدوده ياليت ينوعوا الاختيارات اكثر

مطعم جميل من حيث الديكور ، جلسات جميلة و مريحة
المشوي لذيذ ، لكن البيتزا و المكرونة سيئة
الخدمة ممتازة و سريعة
زيارة واحدة تكفي
سعر المكرونة و البيتزا و البيبسي مبالغ فيه جداً

الديكور جميل جداً .. القهوة والمكياتو .. عندهم حلى افغاني
واكلات افغانيه اول مره اعرفها
الخدمة جيدة جداً .. بس تحس انك قاعد في خلية نحل من كثر الموظفين في كل مكان …

كانت تجربه ممتعه ، المطعم رائع كدزاين وشكل ونظافه واهتمام وسرعه في احضار الطلب ، عجبني جدا ديكوره ، عندهم خدمه صف السياره ياخذو السياره منك ويحطوها بمواقف خاصه ، اسعارهم غاليه ، مستوى الطعام من جيد الي ممتاز ، انتقدت علبه الماء ٣٣٠ مل ب٣٣ ريال ، حقيقه استغرب من الغلا الفاحش للماء بالذات يعني وجهه نظر ارفع سعرك بكل شي الا المويه ، لو طلبت عصير واستمتعت فيه كان افضل لي ، الاطباق الي بالصور مثل ماتشوفو كان سعرها ٣٥٠ ريال تقريبا ،

الديكور جميل جربت القهوة مع حلا كان كل شيء ممتاز الخدمة والسرعه والاجواء العامة قريباً راح اجرب الفطور
رجعت له مره ثانيه جربت الغداء فيه كان كل الاطباق لذيذه طلبنا سلطان كباب يشبه طبق اسكندر كباب التركي كان الكباب لذيذ وكرات المكرونه لذيذه والموهيتو كل الطلبات كانت ممتازه
الجلسات مزدحمه واضطررنا للدخول لمنطقه المعسلات

المكان حي الروضه شارع الامير سعود الفيصل
المكان جدا جميل
نظيف
الاسعار معقوله.
الفطور كان تجربة جميله
سعر الفطور 149
الكمية كبيرة تكفي اكثر من شخص
عبارة عن اجبان خبز بيض. منيو. جميل مشكل. مع الشاهي
خبز سميت لذيذ جدا
الفطور تجربه جميله. عندهم رواقان فخامه جلسات مريحه داخليه وخارجية.

الطلبات كانت
شوربة العدس طعمها جميل ولكن ليس بمذاق مختلف
اصابع الدجاج المقلي جميله جدًا
سلطة جافورداجي خورافيه
بولاني كاشالو 👍🏻
مشروب الموهيتو بالتوت 👍🏻
عصير شمام بالحليب 👍🏻

اسعاره مبالغ فيها يعني مثلًا علبة البيبسي الي بريالين تلاقيها عنده ٢٩﷼ وعلبة الماي ٣٣﷼ والعصير ٤٢﷼ اقل سعر

على العموم اجواء المطعم جميله جدًا والمكان مرتب ونظيف من والى

لكن عاد الله يعينكم على المواقف

بشكل عام الأكل مستواه من جيد إلى جيدجدًا ، لكن الأسعار مرتفعة على الطعم !
طلبنا بطاطا حارة لذيذة
قريدس الجمبري ما عجبني مرة
كرات المكرونة و الجبن كويسة بس مألوفة جدًا
سلطة سيزر كويسة
و طلبنا مكس ميز تغميسات بابا غنوج، حمص ، محمرة ، تبولة ورق عنب متنوع ولذيذ

الرئيسي شامي كباب لذيذ
فاهيتا دجاج جيد
مكرونة الفريدو كويس بس شوية مالحة و الدجاج قليل جدًا
ستيك سلايدر ناشف شوية و مو مرة انصح تطلبوه

“التجربة كانت فطور”
المكان مره جميل وهذا تحسب لهم
-اخذنا السيت منيو حق الفطور ١٤٩ وكان متنوع والشاهي معاه على حسب عددكم اعادة تعبئة للشاهي ببلاش ماكان فيه ابداع 7/10
-اخذنا مناقيش محمره بالجبن للاسف ولا هي محمره ولا شي صلصة بيتزا مع خبز كانت سيئة 😔😔
-البيض للي يحبون النص استواء بيعجبهم اما بالنسبه لنا ماكان جيد ولا طعم ولا لون
التجربة كامله 3/10
ارجو التحسين

الخدمه اكثر من ممتازه وسريعه وبشاشه العاملين ..كانت الجلسه خارجيه الجو كثير ساعد على جمال الجلسه
الفطور اكثر من ممتاز كان فطور مشكل كامل لشخصين لكن هو يكفي ٤ اشخاص بالراحه يرافق الفطور شاي طوال مده الإفطار
لاحظت تعليقات سلبيه كلها تتحدث عن الأسعار
انا راجعت المنيو قبل قدومي وشفت تناسب امكانياتي اولاء …كل واحد يتأكد من قدرته الماديه الأسعار موجوده ممكن تتطلعوا عليها الشاي المغربي ١٠٠ والماء ٣٣ والعصير ٤٢ …….الخ يعني الأسعار ليست* سر *
اتمنى لكم التوفيق

المطعم كبير جدا جدا وبه أماكن كثيرة مختلفة الديكور وكأنه مجمع مطاعم
فخم جدا جدا وتنوع خيارات الجلسات الداخلية والخارجية ،

قائمة طعام منوعة ومختلفة،
الأكل طعمه لذيذ جدا مميزة ولذيذة

مقدمي الطعام لطيفين وقريبين دايما ومرحبين

أفضل حلى أكلته في جده عند كابانا ويقدمونه بطريقتهم الجميلة

مناسب جدا للعرسان وللعوائل

مساء الخير ✨

من دبي إلى جدة

مطعم و لاونج كابانا
‏@kabanasaudi

المكان كبير وفيه جلسات داخلية وخارجية للمعسلات
والجلسات الطربية تقريبًا تبدأ من بعد المغرب 🎷

الديكورات فخمه والجلسات جميلة
حبيت انو عدد الموظفين كبير والخدمة عندهم رائعة 🤩

🔸 طلبات الأكل تبدأ من ٧:٣٠

الطلبات:
مكس مزة ٦٥
كباب شامي ١١٨
رز كابلي “رز على الطريقة الافغانية” ٥٠
كرات المكرونة والجبنة ٦٨
موهيتو توت ٤٨
موهيتو باشن فروت ٤٨
شاهي مغربي وسط ١٠٠

الأكل لذييذ والاسعار مرتفه بس كانت تجربة حلوة وطاقم العمل خدومين 😍👌🏼

جيت نهاية العصر وبعد المغرب المكان امتلى ماشاءالله

🔸 لا يوجد حجز فقط انتظار

📍 الموقع: الروضة – شارع سعود الفيصل ( برج روفان )

المطعم فاخر جداً ولذيذ وجميل ،، الاكل لذيذ ومتنوع ،، الخدمة سريعا ،، الموظفين ودودين ،، قائمة الافطار بكج يكفي من (2-3) اشخاص ب 150 ريال متنوع الاصناف ،، الغداء والعشاء متوفرة اصناف عدة بس السعر مرتفع

مكان راقي وحلو ويفتح النفس
ومستوى عالي من النظافة
الأكل لذيذ
الأسعار من متوسطة إلى مرتفعة ولكن يستاهل السعر
المشروبات تعتبر مرتفعة السعر
موظفين بشوشين والخدمة ممتازة

بصراحة من افضل مطاعم فطور في جدة بل يكون الافضل في الحجاز كله استقبال رائع بوجود سائق يقوم بخدمة وتسليمك مفتاح سيارتك عند الانتهاء احترام طاقم المطعم جميعا وتجاوبهم السريع بحيث لاتحتاج للصراخ او الانتظار
الاكل جداً رائع فطور صباحيا لم اجرب الغداء او العشاء
يعيبه فقط رائحة المعسل
لذلك انصح فيه بالنسبة للعوائل صباحا هادي جداً 👌🏻
في كل تعليقاتي نادرا ما اعطي تقيم ٥ نجوم

المطعم راقي وفخم وجميل فيه جلسات داخليه وجلسات مطله الموظفين تعاملهم راقي جدا وخدماتهم راقيه جدا وتحط السياره والموظف يدخلها المواقف ولمن تخرج يخرجها لك عند الباب مررره اعجبتني هذي الخدمه
انا ذهبت وقت الغداء وطلبت كرات البطاطس ومكرونه وكباب دجاج
الاسعار مرتفعه
الاكل لذيذ
انصح بزيارته

جربنا الفطور في مطعم كابانا وكانت تجربة جميلة جداً من ناحية المكان والخدمة والطعام

طلبنا فطور كابانا ويكفي ٣ – ٤ أشخاص

يحتوي على ٣ أنواع بيض ونواشف وتشيز بلاتر وسلة عيش وشاهي لشخصين

وطلبنا بانكيك التوت كان جيد

الخدمة كانت رائعة والمكان جميل ومشمس والتهوية ممتازة

يتوفر خدمة فاليه باركينق في المطعم فما تشيل هم المواقف

كل عام و انتم بخير
من دبي الى جدة
افتتاح مطعم
كابانا kabana

الاكل افغاني + إنترناشيونال

المكان جميل 🤩 الديكور اجمل و انيق
جلسات طربيه و اجواء مختلفه

الاكل لذيذ 🤤
الاسعار من متوسطه الى مرتفعه

يوجد خلسات خارجية مسموح فيها شيش و تدخين

و يوجد جلسات داخلية بدون شيش

الجلسات الطربيه الشخص ب ٤٠٠

لا يوجد رقم للحجز فقط انتظار

جدة حي الروضة شارع سعود الفيصل

كابانا مطعم أفغاني وانتيرناشيونال فتح قبل فتره في برج روفان..
تجربه كانت جدًّا جميله، الستاف من يوم تدخل لحد ما تطلع وهم يرحبو فيك ودائمًا مبتسمين ما شاء الله برغم ازدحام المكان
الخدمه برضها جدًّا ممتازه حبيتها
الأسعار متوسطه إلى مرتفعه
جودة الاكل ممتازه إلى متوسطه (طبق الدجاج ما عجبنا كان مو مستوي صراحه)

عيب المكان الوحيد الاغاني صوتها مرره عالي ما تقدر تسمع الشخص اللي معاك في الطاوله مع إنه المغني صوته حلو صراحه واغانيه حلوه بس برضه الصوت مره عالي وذا ازعجنا حبتين

التجربه كانت جدًّا رائعه ولازم نرجعله ثاني قريبًا 💜

Leave your vote

Log In

Forgot password?

Forgot password?

Enter your account data and we will send you a link to reset your password.

Your password reset link appears to be invalid or expired.

Log in

Privacy Policy

Add to Collection

No Collections

Here you'll find all collections you've created before.

انتقل إلى أعلى