قبل اسبوع قررت انه ازور مطعم سلطان استيك هاوس المطعم

قبل اسبوع قررت انه ازور مطعم سلطان استيك هاوس المطعم

 

قبل اسبوع قررت انه ازور مطعم سلطان استيك هاوس
المطعم سمعت عنه الكتير في ناس تمدح و في ناس تقول نص و نص و في ناس تقول اسعاره مبالغه فيها
المطعم نسخه من مطعم نصرت التركي الي راح تركيا اكيد جربه
المهم المناسبه كانت ذكرى زواجي السادسه، اخدت المدام و الاولاد و رحنا يوم الجمعه على الغدا كان في مشكله في المواقف المكان مليان مطاعم و محلات و لكن المواقف قليله ،المهم دخلنا المطعم الويتريه رحبو فينا ،خدمه ممتازه (ولدي كان فاضحنا شكلو صاحي على جنبه الشمال بس جالس يرمي العابه و الاكل و يصرخ بدون سبب )
في البدايه قدمو لنا مقبلات (بطاطس مقليه بالبصل و متبله وصوص)  لذيذه و فاتحه شهييه  المنيو مافي صور احترنا ايش نطلب في النهايه طلبنا ما هو اتي:
1 لحمه بالجبنه سعرها 73 ريال
طيبه و لذيذه انك تبدأ فيها مع ان كميتها قليله 3 قطع من اللحمه و بداخلها جبنه 4 من 5
2 اضلاع اسادو لشخص واحد سعرها 165 ريال
يقدم اضلاع و يفرفطها قدامك و تقدم مع صوص الباربيكيو في الخارج، لذيذه بس لو ابغى اكل اضلاع ريبز راح اكلها في تاكسيس رود هاوس اعطيها 45 من 5
3 سلطان مخصوص (اسبيشال) سعرها 349 ريال
سيبك من سعرها الفلكي بس الصراحه كانت افضل طلب طلبته طلبتها ميديم (نصيحه لوجه الله لا تطلب ويل دن انا عارف اغلب الناس تحب الويل دن بس تبغى اللحمه تكون لينه و تندر اطلبها ميديم او ميديم ول)
تجي مع الزبده السائله و قطعه خبز لذيذه و اعطيها 45 من 5
اما الحلى طلبت
1 بيقلاوه بالايسكريم 51 ريال
بقلاوه تركيه و بداخلها ايس كريم 4 من 5 لذيذه
2 سلطان كاتمر 57 ريال
عاديه مع انها كبيره و يقطعها زي المطبق تقدم ساخنه بالايس كريم بس محلايه زياده اعطيها 3 من 5
الشي الجيد عندهم هو انهم ما يقدمو كل شي دفعه وحده، كل ما تخلص  من طبق يقدمو الطبق التالي
تجربه جميله، مطعم ممتاز بس سعره غالي المره الجيه ما راح ازور المطعم الا اذا احد عزمني او في ذكرى اليوبيل الفضي (مرور 25 سنه على الزواج الناجح) او عندي فلوس زايده
الخدمة 49 من 5
الخدمه ممتازه كانو بشوشين و مرحين و بالهم طويل على ولدي الي قالب الدنيا هناك
الجو العام 48 من 5
الديكورات و الجلسات مريحه و جميله
القيمه مقابل المال 37 من 5
فلوس كتير بس ما يضر من فتره لفتره تاكل عنده
الطعم 45 من 5
لذيذ و طيب في الغالب
التقييم العام
45 من 5 انصح بتجربه المطعم على الرغم من اسعاره
الفاتوره كانت 783 ريال انا وزجتي و طفليين
الموقع :شارع الامير سعود الفيصل (الروضه سابقا) عند مجمع اليو شيب
تقييم جدة فودي l4l مطاعم
sultans steakhouse

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *