دا الشي أكل منه لمن أقول ياليل ولا أشبع أهل جدة





دا الشي أكل منه لمن أقول ياليل ولا أشبع أهل جدة

 

دا الشي أكل منه لمن أقول ياليل ولا أشبع أهل جدة و مكة والمدينة يا كثر حبكم للفرموزاوالبف
عبر عن حبك بتعليق بسيط تقييم جميل وصلنا من حبيب القلب باشا مهندس wes w t
لذائذ البخاري
الموقع / مكة حقنا – حي الشوقية – الشارع العام بعد مطعم يونيك الإيطالي
سلام يا ممتتااااااااااااااع

محل جديد فتح قريب في دا العنوان , طبعا زي أي واحد جيعان كان نفسي آكل أي شي ألاقيه قدامي , و لسوء حظ المحل طاح بين أنيابي , و أخذت منه تشكيلة أشياء يحبها قلبك إنت و هوا و هي :- فرموزا باللحم – 85/10 – عجينة مقرمشة من برا بشكل ممتاز و طرية من جوا بشكل رهيب مع اللحم المفروم و قطع البصل اللي أعطته نكهة متاااااع , لكن أعتقد إنه يبغاله شوية بهارات معينة و تكمل الفرحة
بف بالبطاطس – 7/10 – استغربت من دا البف بحشوته البطاطسية المهروسة , كيف آكل بطاطس جوة سمبوسك ؟ طيب أبغا أحط كاتشب كيف ؟ , متعودين ناكلها يا مقلية يا مهروسة يا مشوية , لكن تحسب له نقطة إيجابية في إنها جديدة و حارة و طازة و طرية♨
بف بالجبنة البيضا – 9/10 – قرمشة فطراوة فذوبان فحب و استمتاع , يا سلام لما تقرمش عجينة البف و تجيك الحرارة من جوا مع الجبنة البيضا الذايبة مع النعناع , نكهة مكاوية و لا أروع , و طعم العجينة متتااااااااااع
بف باللحمة المفرومة – 95/10 – يا شيخ كمان 10/10 – شي ما حصلشي , نفس اللي فوقو مقرمشة من برا و بعدين تجيك الحشوة المليانة باللحم المفروم البقري الطازة و الطري و البصل المبهر و أوصال من البيض المسلوق , حفلة ممتتااااااااااع في فمك و طعم و لا أروع لدرجة حملت السيارة كلها كراتين منه و تهريب على جدة
المحل صغير جدا يا دوب 3 انفار يوقفوا ، و المواقف انت و حظك الحلو ، بدأ يزدحم و يسوي صجة في الشوقية و في مكة بكبرها الناس صارت تجيه تدور البف , أحيانا يفوتك القطار و يغلق مالك إلى اليوم التاني تستناه عند عتبة الباب , كل شي عنده بريال بس للحبة الوحدة , و كل شي جديد أول بأول يسوي العجينة قدامك و يفردها و يحشيها و يقليها و يحطها في فمك كمان كل ما سبق كان رأي شخصي يمثلني لا يمثلكم , و لكم الحرية في إبداء الرأي داخل إطار الآداب العامة

 





اترك تعليقاً

لن يتم نشر عنوان بريدك الإلكتروني.

انتقل إلى أعلى