جولة في مطاعم بوليفارد الاردن

لفة ممتعة بالبوليفارد جربنا فيها ٤ مطاعم: حزورة، باباروتي، فري ذا فورك، و فور وينترز.. رح أحكيلكم خلاصة تجربة كل محل و شو حبيت أكثر

حزورة جربت عنده اختراع جديد، تاكوز سمك فيليه و كان تجربة جديدة لطيفة، و ساندويش ستيك مميز جدا ❤️ كل وجبة منهم معها بطاطا و مشروب غازي و سلطة و صوصات، و سعرها ٥ دنانير فقط، و قعدته حلوة و التعامل فوق الممتاز، بالتالي هو “الأفضل قيمة” بتجربة اليوم و أنصح به جدا و لسة عندهم كذا وجبة بخمس دنانير حابب أرجعله و أجربهم، الشيف عندهم محترف 👍
مكانهم جنب ديب ان ديب

بعده نزلنا الدرج و مشينا شوي و كان قدامنا فري ذا فورك، مطعم عالمي و سمعته سابقته بس اول مرة بجربه، متخصص بالسلايدرز (برجرات صغيرة) و التاكوز، جربت مجموعة سلايدرز جاج و لحمة و جربت بطاطا الكيجن و كمان نوع بطاطا مميز نسيت اسمه 😂 باختصار لذيذ جدا جدا جدا، بس برضو غالي جدا ✋ رأيي انه بيستحق الواحد يحوش و يجربه مرة و ممكن جدا يعيدها

مقابلهم تقريبا بنلاقي باباروتي، بهالتجربة اخدنا حبة مع رفايللو و حبة مع بستاتشيو، تجربة حلوة و الرفايللو بتفوز بقوة 💕 لكن ما حسيت اني استطعمت بالbun نفسها منيح، هل طعمها أخف من لما كانو فاتحين زمان ولا النكهات المضافة خدعتني لأنهم كريمين فيها و طاغية؟ لازم أرجع أجرب بدون اي إضافات عشان أحكم ع الأكيد.. السعر غالي برضو خلو ببالكم ✋

و آخر تجربة كانت عند فور وينترز، متخصص ب البوظة اللي بتتجمد بالنيتروجين قدامكم و عنده نكهات خاصة لكل فصل في السنة.. جربنا السيريال و الكوكيز، السيريال معها توفي و نتيجتها رائعة جدا 😍 الكوكيز للأسف بينضاف عليها دارك شوكليت وانا مش صحبة معها 🤦‍♂️ لو بعرف كان طلبت انه ما يضيفوه عشان أعطيها تقييم بتستحقه، لكن شغلهم بالعموم مميز و بيستحق ❤️ بتقدرو تعتبروه غالي كمان لكن ما فرق عن محلات بوظة مشابهة بالسعر

و قبل الترويحة لازم الواحد يمر ع الحموي جوا العبدلي مول ياخد شوية نقاريش ❤️ بنصحكم جدا تجربو كاجو الجبنة، و بحب آخد تشكيلة مكاديميا من عندهم

بتمنى اكون افدتكم، بتهمني اراءكم و بيسعدني دعمكم، احكو لكل معارفكم عن صفحتي و سنابي عشان اقدر اظل اجيبلكم خصومات قوية و نستمر بالتجارب الجديدة ❤️ تابعو الصفحة و شغلو التنبيهات و المشاهدة أولا عشان ما يروح عليكم اشي

انتقل إلى أعلى