جوبي فرايز جدة

جوبي فرايز جدة 1

احيانا الواحد يشتهي بطاطس ويبغى شي جمبها مو العكس
تجربتنا ل اسم معروف ومن اول المحلات اللي بدأت بالطريقة دي

فرعهم في حي الروضة، وجربنا من عندهم اشياء لأول مرة

طلبنا جوبي ساندوتش، يجي معاه بطاطس (طلبتها سادة)
وطلب فرايز بالدجاج بكل الصوصات
وتجربة لعصير ٩٥ (فمتو)

طبعا جوبي يميزهم الدجاج نفسه، مستوي كويس، مقرمش من برا وطري من جوا
الساندوتش عيش بريوش طري، وغرقان صوصات
البطاطس اللي معاه كميتها اقل طبعا من طلب البطاطس وبدون دجاج
بس عندهم طلب تاني يجي مكس
فرايز بالدجاج كميته ما شاء الله كبيرة، لذيذ وكمان مليان صوصات
عصير الفيمتو حكاية، من جد عجبني مع الاكل، يجي في كيس، ومفرز شوية، بدون ثلج، يوصلك جاهز للشرب، اختراع رهيب مع الوجبة
الشي بس اللي زعلني في طلبي، ان كل شي جاني سبايسي وانا كنت طلبته عادي

الواحد ياكل طلب الى طلب ونص

فرايز الدجاج ٢٩ ريال، الساندوتش ٢٧ ريال، والفيمتو ب احلى سعر ٤ ريال ونص

طبعا كل طلب في علبة كرتون والاشياء كلها في كيس ورق مغلق من المطعم للحماية

طلبنا عن طريق تطبيق كريم واستخدمت كوبون، الطلب وصل في سرعة كويسة وحرارة جيدة
موجودين كمان في هنجرستيشن

** مشتهي بطاطس ؟ جوبي فرايز اختيار ممتاز، الساندوتش كمان جيد، والفيمتو احسن اختراع مع الاكل، الطلب من كريم كويس 👍🏻 اكيد ليا تجربة ثانية معاهم، عشان اجرب عصير ٩١ وكمان اقارن الاكل اذا كان مو سبايسي كيف حيكون طعمه 👌🏻

تعرفو محل ثاني غير جوبي متخصص في الفرايز بالطريقة دي ؟ للاسف كنت اعرف ٢ غيره وكلهم قفلو 😔

انتقل إلى أعلى