تقييم جميل وصلنا من حبيبنا الذويق wes w t محل عبدالرحمن

تقييم جميل وصلنا من حبيبنا الذويق wes w t محل عبدالرحمن

 

تقييم جميل وصلنا من حبيبنا الذويق wes w t
محل عبدالرحمن حلواني
الموقع/ حي الفيصلية – مركز شاكر ( الفاو سابقا ) – شارع الروضة باتجاه الغرب قبل كوبري المربع و بجوار إنتو مول و سلام سنة نبينا صلوا على أحمد نبينا يا أصحابنا والله جينا جينا عند حبيبنا الحلواني اللي عنده الهريسة بالسمن كلام تاني , يعتبر المحل منافس قوي و شديد لمحل حلويات أبو نار و محلات شهاب بدرة بشكل بسيط و قليل , و لكل محل فئة من المعجبين كحالتي أنا شخصيا المعجب بمحل عبدالرحمن حلواني منذ الصغر , و رغم تجربتي لحلويات أبو نار و شهاب بدرة إلا أن الحلواني جذبني و بكاني و أتلبس كياني محل يرجعك للماضي ساعة زمان تتزكر فيها أيام سيدك و ستك الحلوة و أيام البشكات في الحارة على الدكة لما تشوف عنده اللدو و اللبنية و التعتيمة الجبنة البيضا الحادقة و الطرشي و الأمبا و تشوف الهريسة بالسمن و المفروكة و المشبك و دجاج البر و ازا التفت ناحية اليمين حتلاقي الشريك البلدي و المعمول بالتمرة و لو التفت ناحية الدرجان حتلاقي قمر الدين بجميع نكهاته و شوية حلويات حلوة تنفع للبزورة و تلاقي العم عبدالرحمن أو ولده في الكاشير جالس بالغبانة يقلك هنا و عافية يا سيدي
روحتي للمحل غالبا تكون عشان الهريسة بالسمن اللي بصراحة الى الان ما لقيت احد يزبطها و يسويها زي حبيبنا العم عبدالرحمن , طعم رائع و جميل و مسبكة مزبوط و مشبعة نكهة و سمن حتنبسط لما تاكلها و مشهورة في وقت الاعياد و الافراح و جمعات الاحباب و تنباع بالكيلو و ماني متزكر السعر بصراحة لكن يعتبر حلو و خفيف عالجيب و دام اني هناك انا بالمرة قلت خليني اخدلي من عنده كم كيلو لدو و لبنية و معجون و يقولوا عنها احبابي و اقاربي انها رهيبة و لزيزة و اخدلي كمان بكم ريال كدا شريك بلدي اللي يجيك في البداية ناشف شوية بس بعد ما تحميه في الفرن تشوف طرواته و لزته في فمك وجبنة بيضا و أمبا و مخلل ليمون , عشان أروح البيت و أتعشى نواشف متااااااع بعد ما تسوي المفروكة و البيض المطجن , و يصير عشا خفيف و لزيز و رخيييييص , منها تحلي و تحدق و يقلك المثل زمان ” من حلى و حدق كأنه صام و صدق ”
بشكل عام المحل يستاهل 9/10 و ما أدري ازا له فروع تانية , و ماشالله دايما زحمة و الطلبات أول بأول علىt الهريسة و اللدو و اللبنية طلبات حفلات و أفراح يزبطوها لك في صحن مزخرف مع تلبيسة جميلة , العاملين هناك من الجنسية البنغلاديشية جميلين و رائعين و متعودين صاروا على كلامنا الحجازي
حياكم الله في حسابي للطبخ تابعوني
dhom bagies2015
dhom bagies2015

 

انتقل إلى أعلى