المندره أكل فلاحي المثل بيقول : تعرف

المندره أكل فلاحي المثل بيقول : تعرف

 

المندره
أكل فلاحي المثل بيقول : تعرف الاكل الفلاحي؟ اه؛ جربته عند المندره؟ لا ؛ تبقى ماتعرفوش
وهو ده فعلا اللي حصل لما رحنا المطعم الرائع ده اللي فتح في قلب القاهرة الجديده
اول ما دخلنا انبهرنا بديكورات عظيمه و تفاصيل كثير تاكد ان اللي قرر يفتح المكان ده عايز يغير خريطة الاكل في التجمع و يمشي في سكه محدش سبقه ليها و يتميز و يطلع على قمة الاكل الفلاحي و يقول هل من منافس
البوابه الخشب العظيمه و الحصير و الساقيه و القلل و برج الحمام و الطبليه و الفرن البلدي و البرامات كلها بتقول انك خرجت من التجمع و دخلت دوار العمده في كفر فلاحي اصيلمن اجمل المميزات في المطعم ان المطبخ مكشوف تماما و تقدر وانت قاعد في اي مكان تشوف ايه اللي بيتعمل و ازاي
قعدنا على الكنب البلدي و طلبنا منهم اكل يعيشنا الجو اللي قاعدين فيه و هو ده فعلا اللي حصل
بدات السلطات تنزل البلدي و الباذنجان المخلل والزبادي مع العيش البلدي المخبوز و طالع سخن م الفرن و بدانا ننقنق و نضرب باذنجان و نطفي بالزبادي مع السلطه البلدي
بعدها وصل العدس العظيم بالعيش المحمص و نص الليمونه اللي طعمه كانك بتاكله من ايد جدتك لما تروح تزورها في ليله شتا و تقولك “اما ياواد عاملالك النهارده شويه عدس بالسمنه البلدي من اللي قلبك يحبه”
خلصنا العدس و لقينا هجوم من برامات الفخار نازل علينا و ريحتها سابقاها ( لحمه بالبصل و باميه باللحمه و مكرونه بالبشاميل ) بصراحه الثلاثه طعمهم احلى من بعض و لحمتهم ذايبه و وطعمها فلاحي ابن فلاحي
في النص نزل لنا طبق محاشي خيالي فيه كل الاصناف و طعمه بيتي قوي و ياسلام على الممبار اللي مالوش حل فعلا
طبق المشاوي كان محترم و طعم الكفته و شيش الطاووق حلويين و جوسي و رز الخلطه القرفه باينه فيه وطعمه مميز
في بقى طاسه نزلت لنا حكايه و عظمه و طعم خطير و معموله بمزاج قوي و هي طاسة الكبده الاسكندراني اللي لازم تجيبها لما تروح بس ماتنساش تاكد عليه يعملهالك بفلفل حامي خلصنا الجزء الاول و اتنقلنا للجزء الثاني و قعدنا على الطبليه و الحصيره على الارض و نزل لنا احلى فطير مشلتت بلدي معمول بايد فلاحه جنبه مش طالع من الزلعه و عسل اسود و طحينه و قشطه بلدي مالهومش حل و جنبهم طبق الفول بالطحينه و قرص البيض و تحبس باستكانة الشاي في البراد الصاج و هتلاقي جواك طاقه تهد جبال بعد كل ده مارضيوش يخلونا نمشي الا لما نحلي الكنافه البيتي اللي عملوها قدامنا و طاجن ام علي بلبن طازه طعمه حلو قوي

 

الموضوع منقول





انتقل إلى أعلى