أمس الصباح انشغلت شوي والظهر كنت (منعبة )للدوام ويوم جيت المغرب

أمس الصباح انشغلت شوي والظهر كنت (منعبة )للدوام ويوم جيت المغرب

 

أمس الصباح انشغلت شوي
والظهر كنت (منعبة )للدوام
ويوم جيت المغرب طلبت غداي
فما تقهويت ،،
يمكن نسيت أو تناسيت
قمت الصباح وأنا تعبانة،،
و زعلانة
(وشرهانة)
وكل أحد بالبيت عندي عاتبته بقلبي
ولمته بقلبي على أشياء بايخة وتافهة
بعدها بشوي تذكرت إني ماتقهويت
سويت لي فنجال قهوة تركي،،
ودورت لي شيء حلو آكله معه
ورووووووووقت
ورضيت
وصارت الدنيا لونها (بمبي )
وصاروا الناس كلهم حلوين وأحبهم
وقمت (وتقوست ) (قمصان )شي إن اللي وصلتني أمس ،،
وطلعن حلوان
صح إنهن كبار شوي
بس عادي،،
لأني (مسفهلة )شفتهن حلوات
وبديت أراسل بنتي بالجامعة
أسألها عن العرض اللي مطلوب منها اليوم
وش سوت فيه
ووش كان تعليق الأستاذة،،
ووش كان شكل وجهها وهي تسمعك تشرحين،،
مبتسمة أو مركزة،،أو مكشرة ،،
عاد بعدها تذكرت أميمتي الله يغفر لها ويرحمها
مرة رحت لمكة
لبيت أهلي
قبل ماتسكن أمي بالرياض،،
وكنت قبلها مقررة إني أخفف قهوة
قعدت عندهم أول يومين وأنا (ماش)
أحس مو سعيدة مثل عادتي إذا رحت عند أهلي
قلت لأمي؛
ما أدري وش بي ،،،
أحس عجزانة،،،كسلانة،،،مالي خلق،،،
قالت؛
أنا أدري،،
اركبي مع (حسن) وروحي (لابن داوود) وجيبي لك القهوة اللي أنت متعودة عليها،،،
والمرة الثانية إذا بغيتي تجينا أول شيء تحطينه بشنطتك القهوة اللي تحبينها،،
حطيها قبل الملابس،،
وإذا بغيتي يابنيتي تصيرين مثالية وصحية و تأدبين روحك وتتركين القهوة فموب عندنا ،،،
أنت جايتنا فترة (شوية) انبسطي معنا وخل ننبسط معك،،
وبس،،
الترجمة لغير الناطقين بلغتي؛
١/منّعبة أو منعوبة؛مشغول بالها ومستعجلة٢/شرهانة؛بخاطرها لوم وعتاب
٣/بمبي؛وردي
٤/تقوست؛جربت المقاس
٥/قمصان؛ملابس البيت
٦/مسفهلة؛راضية ومروقة ومنشرح خاطرها
٧/ماش؛ماعرفت أجيب لها ترجمة حرفية،،،لكن (ليس كثيراً)أقرب شيء لها
٨/حسن؛سواق أهلي الأندونيسي لفترة طويلة
٩/ابن داوود؛بقالة شهيرة بمكة
١٠/شويه؛قليلة☺️☺️
،،،،
ترى الترجمة متعوب عليها

 

انتقل إلى أعلى