أفضل مطعم يقدم الاستيك في نظر صديقنا تقييم اليوم وصلنا من

أفضل مطعم يقدم الاستيك في نظر صديقنا تقييم اليوم وصلنا من

 

أفضل مطعم يقدم الاستيك في نظر صديقنا
تقييم اليوم وصلنا من حبيبنا الذويق aotorgi
السلام عليكم و رحمة الله وبركاته اسعد الله يومكم بكل سعاده و حب يارب
من فتح المطعم وانا اقول ان شاء الله بكره اروحوا و يجي بكره و ارووح بس ما الاقي موقف او زححححممممممه الين ربي يسرها و الحمدلله و جا بكره و دخلت مطعم تكساس رودهاوس و طبعاً كالعاده زحمه لكن سرانا ما طول اكثر ١٢ دقيقه وخلالها استمتعت بمناظر اللحم الاحمر الي تشهي الواحد ياكلها نيه و اخذتلي فررره على طبخهم للاستيكات والاضلع وغيرها من اصنافهم الجميله و بصراحه في دقايق الانتظار استمتعت كتير وبعدها اتوجهنا على طاولتنا مع ويترنا الخاص الجميل والبشوش و الخدوم والي طفشنا كل شويا عن سؤاله لراحتنا و كدا طبعا ضيافتهم كانت عباره عن سطلين نعم سطلين واحد مليان من الفول السوداني و تاني فاضي عشان ترمي قشر الفول فيه و بصراحه السطل عجبني اضافة الى كم قطة من العيش الجميل المخبوز عندهم الطري والمدهون بالزبده مع صوص جميل و حادق اخر حلاوه نجي في طلبات ، طبعاً انا رايح و نيتي على السيرليون و بالفعل كان طلبي لكن ناسي كم حجم القطعه افتكر اني طلبت اكبر شي و المدام طلبت اضلع رب اي و الجميل عندهم انها بالحبه عكس المطاعم التانيه الي تلزمك بقطعتين ، مع كل طلب تقدر تاخد صحن جانبي و كان طلبنا سيزر سلط و البطاطس المهروسه دحين نخش في وصف المتااااااع الي ما يتنسي
قطعة الرب اي فعلاً اي اي اي طريه و جميله و تلعب في الفم لعب مع صوص الباربيكو الجميل يا ربااااه طعم و وصف غريب و صعب شرحه من حلاوته
اما قطعة الحب السيرليون طلبتها مديم ول وكانت فعلاً مديم ول والجميل لمن يجيك الطبق ما يمشي الويتر لين يتاكد انه جاك الطبق حسب طلبك كانت بعصارتها الجميله و طعمها المجنون الي تخلي اسنانك تستطعم حلاوة مضغها وتجيبها يمين وشمال و بعده هوووبا ع المعده
و فعلا فعلا مطعم يستحق ١٠/١٠ و زيارتي له ما راح تكون الاخيره بل باذن الله الشهريه الدائمه التكلفه لمحبين السؤال عنها كانت ٢٤١ ريال
نلقاكم في تقرير قادم ونصيحه روح و قلبك قدك وانسى باقي المطاعم الي تقدم نفس اصنافهم لانهم ما يتقارنووووووا تكساس رودهاوس شمنقا حبش المتاع

 

الموضوع منقول



انتقل إلى أعلى